Первомученице Фекле Иконийской.

Тропарь (глас 4)

Словесем Павловым научившися Богоневестная Фекло, и верою утвердившися от Петра, богозванная первомученица явилася еси и первострадальница в женах, возшла еси на пламень яко на место благоцветущее, звери и юнцы устрашишася тебе, вооружися бо крестом: тем моли, всехвальная, Христа Бога, спастися душам нашим.

Слава и ныне:           (Кондак, глас 8)

Девства добротою просияла еси, и мучениства венцем украсилася еси, апостольству вверяешися, дево, яко преславная, и огня убо пламень в росу преложила еси: юнца же ярость молитвою твоею укротила еси, яко первострадальная.

Память 7 окт.

Святому преподобному Моисею Угрину Печерскому.

Тропарь (глас 3)

Другаго тя Иосифа, великой чистоты и целомудрия рачителю, всечестне и равноангельне Моисее, священными песньми восхваляюще, грешнии, молим ти ся прилежно: моли Христа Бога, яко да исцелит вся наша страсти и подаст велию милость.

Слава:             Ин тропарь (глас 3)

Труды и подвиги со страстьми по чистоте твоей видя, святе, кто не дивится? Глад бо, темницу и раны приемля, не поработился еси сластем ляховицы, но, яко царь, страстьми обладаяй, ныне и тогда возпрославился еси от Всевидящаго человеческая сердца, от Негоже во искушениих всем пособствовати благодать прием, пособствуй и нам, твою память чтущим, Моисее преподобне.

И ныне:                         Кондак (глас 3)

В Вышних Единаго Бога ища, земная вся презрел еси, о телеси своем нерадив, на муки мужески себе вдал еси, глад, жажду, узы, в темнице затворяемь, доблественно претерпел еси, биения, кровеизлияние и удов отрезание, чистаго ради девства твоего, мужески понесл еси. И ныне с девственными лики предстоя Пресвятей Троице, от всех искушений моли избавитися вопиющим ти: радуйся, Моисее, отче блаженейший.

Также можно обратиться к святой мученице Фомаиде (26 апр.), святой мученице Иулиании (3 янв.), преподобному Иоанну Многострадальному (31 июля).